QARÍNDAS

Qaraqalpaqsha

at. 1. Bir anadan tuwılǵan ózinen kishkentay qız, tuwısqan qız. Erjannıń qarındasın uzatıp jiberiw biydiń moynıńda (K.Sultanov). Qarındası akılsız bolsa, Aǵasınıń bası ǵawlaydı, Patshası jaman bolsa, Puqarasın jawlaydı (qq.x.n.m.). Qatırma kóylek qan bolsa, Sıǵıp juwar qarındas (Termeler). Tawda bolar tarǵıl tas, Aǵarlar kózden selli jas, Tar qoltıqtan oq tiyse, Súyew bolar qarındas, Alladan kún-tún tilegen, Uyadashı, sińlisi, Ǵárip nashar, muńlısı, Sińli dárkar jigitke (Termeler). 2. Ulıwma hayal-qızlarǵa jası úlken er adamlardıń aytatuǵın sózi. Biziń usınǵan kesemiz tınıp tur ma? Tınǵanın ol zamanlas bilip tur ma? Bir kese bergen shaydı alalmastay, Qarındastıń dińkesi kurıp tur ma? (Aytıstan úzindiler). 3. Tuwısqan, guwǵan-tuwısqan, aǵayin. Qádir bilmes qarındastan, Ǵaybana bolǵan dos artıq (Termeler). Qashıq otırǵanıń jaqsı, Qádirin bilmes qarındastan (Termeler).