YAD
Qaraqalpaqsha
at. Belgili bir nárse xaqqındaǵı oy, es.
Onıń kózleriniń kúlip turǵanları meniń menen isles bolmasa da yadımda (J.Aymurzaev).
YAd etiw — este saqdaw, oylaw, eslew, umıtpaw.
YAd etip basladıq kósemniń atın, Jigitlerdiń arttırdı ol ǵayratın (Ád.
alm.).
Keshte kúndiz ata-anasın yad etip, Xızmet eter ata-ana xalqı ushın (Berdaq).
YAdına alıw — esine alıw, oylaw, eslew.
Bar balam, bar, tezirek bar, Anańnıń sózin yadqa al (Á.SHamuratov).
Ol ótken teris tartıs sózlerdi yadına alǵısı keldi (Ó.Ayjanov).
YAdına túsiw — esine, oyına keliw.
Erteńine azanda úyden shıqqanda atqa berermen dep alıp shıqqan at dorbadaǵı arpa yadına tústi (M.Abdireymov).
YAdıma túsiw — oyıma, esime keliw, túsiw.
SHayır menen bayaǵı sharbaqta ushırasqanım yadıma tústi («Ámiwdárya» j.).
YAdqa almaw — oyǵa, eske keltirmew.
Sondaǵı aytqanları bolmadı, Suwsızlıqtı hesh kim yadqa almadı (Á.SHamuratov).
YAdınan shıqpastay bolıw — esinde, oyında qalǵanday bolıw.
Jálladlardıń asıp turǵan darları, YAdınan shıqpastay bolǵan yaranlar (S.Nurımbetov).
YAdınan shıǵarmaw — oyınan, esinen shıǵarmaw, esinde, oyında saqdaw.
Biraq, Palwanın yadınan shıǵarǵan joq (Ó.Ayjanov).
YAdımda bolıw — esimde, oyımda saqlanıw.
Tap házir de ózimniń ulıwma xalıq ushın xızmet islep júrgenim yadımda bolıp, keńsege ruwxlanıp keldim (Ó.Xojaniyazov).
YAdqa túsiw, yadqa salıw — oyǵa, eske keliw, eske, oyǵa eskertiw.
Jalınsa da sirá qıyın bolmadı, YAdqa tústi sonsha adam shaǵlaǵanı (T.Jumamuratov).
... tún ishinde betten sıypap elpip esken mayda jumsaq samal esten shıqpaytuǵın sezimlerge tolı shiyrin máhállerdi yadqa túsiretuǵın edi (Ó.Xojaniyazov).
YAdta saqlaw — este, oyda tutıw.
YAdımda joq bolıw — esimde, oyımda bolmaw, umıtıw.
Tanıp turman ózińizdi, Biraq, yadımda joq atıńız (SH.Artıq).
Áttegene-ay, seniń yadıńda joq pa, ol balanıń úyi qay kóshede edi... (Ó.Ayjanov).
YAd ettire beriw — qayta-qayta yadlata beriw, tákirarlatıw.
Esbergen molla tek kitaptı yad ettire beredi (K.Sultanov).