SÍRT
Qaraqalpaqsha
at. 1. Bir nárseniń arqa tárepi, tamanı, ekinshi beti.
Aǵa begler sırtım pútin, Ishim janıp boldı tútin, Asırıp zalımlar isin, Hesh bir rehim qılǵan emes (Berdaq).
Qaqpaǵın kóterseń — mázi kuw súyek, Sawdırasıp jatır.
Al, sırtın kórseń, — Arameyshe jazıw.
Hám de eńirep, Jılasqan xayallar tiri me derseń (I.YUsupov).
Sırtınan pidjagin kiydi de, xesh nárse bilmegen kisi usap jolǵa shıqtı (T.Qayıpbergenov).
Jat adamlar shardan eki adım sırtqa shıqtı da, irkildi (M.Nızanov).
Kóp ótpey awıl sırtında jalǵız atlı batıs tamanǵa at jorttırıp barar edi (K.Kárimov).
2. Jámáátte bir adam joq waqtında, qatnaspaǵanda, bolmaǵanda.
Bir músápir ǵáripti, sırtınan sayıwshı bolma («Máspatsha»).
Barlıq xalqını jıydırıp, Húkimin jónsiz sıydırıp, Sırtınan neke qıydırıp, Qırq sulıwdı alǵan eken (Berdaq).
Ol óltirse jurttıń sırttan aytarı, biysharaǵa jaza qurıq túsken der (T.Jumamuratov).
«Domalaq arza» jazıp, sırttan sayıp, Sóylesip tiri menen tirilershe, Ashıqtan-ashıq bárin sóz qılayıq (I.YUsupov).
Awzı jeńilleri xandı sırtınan sókti de, bazıları miynette xalıq qatarı, izzette qul qatarı ekenin aytısıp, óz ara giyne qılıstı (T.Qayıpbergenov).
Qolına túsken nárseni bas-kóz demeydi, ılaqtırıp jiberedi, birewlerdi zaw-zatın qaldırmay sırtınan sógedi (M.Nızanov).
3. Óz elinen, awılınan basqa uzaq jer, mámleket.
Sırtta júrip sizler menen baylanıs jasaǵan adam bolsa kerek (Q.Áwezov).
- Aǵa, sonsha jıl sırtta júrseńiz de naqıl-maqallarımızdı umıtpapsız, - dep kúldim men (M.Nızanov).
0 Sırtqa shıǵarıw — xabarlaw, járiya etiw.
Quwanǵan sezimin sırtqa shıǵarǵansha asıǵıp, bir nárse xaqqında sóz baslaǵısı keledi (T.Qayıpbergenov).