SILTEW
Qaraqalpaqsha
fey.
1. Birden bir nárse menen háreket etiw, sermew.
Serlep istiń piter jaǵın, Salıp bular aybaraǵın, Siltey almay jaw-jaraǵın, Uslamaqshı bolǵan eken (Berdaq).
Esikke kulıp urılǵan soń, Ajarǵa «bekkem bol!» degendey barmaǵın siltep, sırtqa shıǵıp ketti (K.Sultanov).
Esik-tórli jerden nayza siltese, dál tiyǵizedi, adamdı sespey qatıradı (T.Qayıpbergenov).
Qolına uslaǵan beldi bas ushına kóterip, aqsaqalǵa siltedi, qayımshıl at taysalıp ketip, iyesine soqqını tiydirmedi (K.Kárimov).
2. Baǵdarlaw, jiberiw, kórsetpe beriw.
Jeterseń muratqa xızmetler etseń, Elatıń siltese ǵayrı elge ketseń, Dushpannıń hár qashan basına jetseń, Ayanbaǵıl xızmetindi xalıq ushın (Berdaq).
Múmkin bizge jol silter, Keńes berse tıńlayıq (B.Qayıpnazarov).
Arbaların jónetip bolǵan soń Múshirip Qosıbaydıń qasına kelip: — Ótemurat pushıqtıń úyin silte! — dedi (K.Sultanov).
Jıllar óter, gújim erjeter, Saya berer sharshaǵanlarǵa, Talay áwlad astınan óter, Siltew bolar adasqanlarǵa (I.YUsupov).
Jaman adamnıń jol baslawınan, jaqsı adamnıń siltewi artıq (naqıl).
Ol tek siltep qalmadı, xan úyine baslap, úsh-tórt júz qádemdey qalǵanda, ózi attan tústi, bulardı da piyada júriwge májbúrledi (T.Qayıpbergenov).
Biletuǵınlardıń siltewi menen Erkinbay Petrovichtiń úyin taptı (K.Kárimov).
— Tóne qalaǵa qarap ayday ber, ózim silteymen (M.Nızanov).