SAWDA
Qaraqalpaqsha
at. (p.
— aldı-sattı, sawda-satıq, aldı-sattı pitimi).
1. Tovardı, buyımdı satıw, satıp alıw, almastırıw menen baylanıslı bolǵan eki tárepleme qatnasqa baylanıslı másele, alıw-satıw isi.
Bir kúni Qádir sawda islew ushın zavodqa emes, al pristanǵa dúkánına qayırıldı (K.Sultanov).
Tórtkúlge bir sawda xızmetkerin jiberip balalarǵa oyınshıqlar aldırdı (T.Qayıpbergenov).
2. awıs. (a.
— táshwish).
Insan turmısında ushıraytuǵın ǵam-táshwish, mashaqat, waqıya, hádiyse.
Sol sawda bolǵan túnde tań atqansha Saadatjan uyqılamadı (B.Bekniyazova).
Ata ushın bala ólimin keshiriw ańsat sawda emes (T.Qayıpbergenov).
0 Basına sawda salıw — hár túrli nárselerge ushıratıw.
Múytán tuqumı tenták boldı, Jayılǵanǵa sawda saldı, Jayılǵan bay bárin qırdı, Ekki bala qalǵan ekán (Berdaq).
Tuwǵan eldiń ar-namısın alıp kel, Dushpannıń basına sawda salıp kel (S.Nurımbetov).
Ashıqlıq penen kóp oynama, bala, Aqıl-xuwshıń biylep alar muhabbat, Dártsiz kewlińdi sen qıynama, bala, Saw basıńa sawda salar muhabbat (I.YUsupov).
Basına sawda túsiw — qıyınshılıqqa ushıraw.
Jaman menen dus bolsań, basıńa sawda túskende, óziniń basın qorǵaydı (Q.Ayımbetov).
Balasınıń jawda qazalanǵan kúyigi menen kelininiń saw bası sawdaǵa túsken dárti qosılıp, órt bolıp sharpıp kelip ózegin órtegen soń kempir eki-úsh kún daǵdırıp otırdı da, balasınıń arqalap tal túste Erjannıń úyine bardı (K.Sultanov).
Ursań, ses bermey me zıńıldap tas ta, Ayralıq sawdası túskende basqa, Xannıń qatal kewli mumday jibisip, Qan ornına kózi lipledi jasqa (I.YUsupov).
Sonda men qaralınıń basına bul sawdalar túspes edi (T.Qayıpbergenov).
Jan sawdası — tirishilik ushın gúres isi.
Jan sawdası bar jerde uyqı ne jesin (Ó.Xojaniyazov).
Ómirlik sawda — ul úylendiriw, qız uzatıw, eki insannıń qosılıp, shańaraq bolıwı.
Bul ómir sawdası (Ó.Xojaniyazov).