PÁRMAN
Qaraqalpaqsha
at. 1. Buyrıq, xúkim, jarlıq.
Jurtım meni shayır dese, shayırman, ne dese de pármanına qayılman (T.Jumamuratov).
Párman menen qılısh sermep, Jawdın basın toptay qaqtı (J.Aymurzaev).
Amanlıqta olar menen Maman biydiń pármanın izertleskendey pursat bolmadı (T.Qayıpbergenov).
Grushindi zindanǵa salıwǵa siziń atıńızdan párman tayarladım (T.Qayıpbergenov).
2. Xúkimettiń joqarǵı orǵanı yaki mámleket baslıǵınıń zań kúshine iye bolǵan buyrıǵı.
Párman shıǵarıw.
Ózbekstan Respublikası Prezidenti pármanı.
3. Quwat, kúsh, dárman.
Káwlinde ketpegey túrli ármanım, Sen bolmasań kimge jeter pármanım («Alpamıs»).
Baydıń isi párman menen, Joqtıń isi árman menen (qq.x.n.).