MAL
Qaraqalpaqsha
at. 1. Tórt túlik mal: jılqı, qara mal, túye, qoy-janlıq hám t.
b.
Mal alası sırtında, adam alası ishinde (qq.x.n.).
2. Dúnya, múlik.
Mal, dúnyasın giznegen, Ózin maqtap kóp sóylegen (A.Dabılov).
0 Mal-bas a) mal-dúnya, bar-joq, dúnya-múlik.
b) mal hám adam.
Túrkstannan Qońırat kóshti, Sárxun dáryasına tústi, Malı-bası jáne ósti, Mıklım abat bolǵan eken (Berdaq).
Mal-dáske — dúnya-múlik, bar-joq, mal-dúnya.
Abıraylı áke bolǵanda, apa bolǵanda, mal-dáske bolǵanda gúlalagúl, bolar edi (T.Qayıpbergenov).
Mal-dúnya — dúnyanıń barlıq túri.
Malǵa jıǵıw — Mal berip qaratıw, mal-dúnyaǵa baǵındırıw, maldıń kúshi menen alıw.
Malǵa jıǵıp sorlı qızdıń atasın, Bir kúni baylap alıp ketti Arıwdı (I.YUsupov).
Mal otı — mallardıń jeytuǵın otı.
Mal óris — mallardıń jayılatuǵın jeri.
Mal-múlik — dúnya-mal, baylıq, bar dúnya.
Malıw-mulkim, hárne barım, Tapsırdım men táńirge (Ájiniyaz).
Qaydan júrseń, qaydan keldiń degen adam bolsa, ózi ólimdar, malı-mulki talan-taraj bolsın dep qolına jarlıq xat berdi («Alpamıs»).
Mal-sal — mal tuqımı, mal áwladı, mal tuyaq.
Al endi qalǵan aylıqlarıńızǵa mal-sal, eshki-peshki alaǵoyıńlar degen sózi unamagan edi (J.Aymurzaev).
Mal-hál — dúnya-dáske, múlik, jay-jaǵday, xojalıq, turmıs.
Bizge mal-háldi bermediń, Kózlerdiń jasın kórmediń, Bul basımnan óttiń dáwran (Berdaq).
Mal-hálge aǵamnıń hárgiz bası aylanbaydı (Ó.Ayjanov).