KÁN
Qaraqalpaqsha
at. 1. Jer astındaǵı qazılma paydalı baylıqlardı qazıp alıw ushın qurılǵan jer astı kurılmaları, sonday-aq, bunday qazılmalardı alıwdı ámelge asırıwshı taw sanaat kárxanası.
... Geoloǵiya hám geofizikalıq izertlew — barlıq jumısları nátiyjesinde jer astı kánleriniń kóp ekenligin bildi... (Q.Orazov).
Burq-burq etken burǵılardıń, Naǵra tartar boz shóllerde, Neft káni bar bul jerde (I.YUsupov).
2. Paydalı qazılmalar toplanǵan jer hám usı qazılmalar toplamı.
Usı duz káninen eshekli, túyeli, arbalı duz aldırıp, sol duzdan kóp jerler paydalanǵan («Jetkinshek» g.).
3. Kóplik, molshılıq.
Tumsıǵın suǵıp dánime, Qol saldı miynet kánime (Kúnxoja).
4. Kóp, mol.
Biraq, sóylesken menen sóyleskenniń, bas-ayaǵı kán (Ó.Xojaniyazov).
Aradan kánwaqótti,... (Q.Irmanov).
Isim pitti dep oylanba, Pitpeǵen is kán, qaraqalpaq (S.Májitov).
5. Nátiyje, negiz.
SHayırlar jazsa jır bası, Azada egin aǵzası, Toylardın sıylı sawǵası, Jipek paxta kánin maqta (K.Sultanov).
Belgilepti Qazaqstan jerlerin, Tastırıwǵa aq biydaydıń kánlerin (T.Seytjanov).
6. awıs. Tiykar, dárek.
Bul baxıttıń gúlleri — ómirdiń sáni, Bul baǵdıń miywası — ómirdiń káni (I.YUsupov).