KELIN
Qaraqalpaqsha
at. 1. Balasınıń yamasa inisiniń hayalı.
— Haw, meniń kelinimdi ákelip ber (S.Xojaniyazov).
2. Aǵayın-tuwǵanlardıń ózinen kishilerdiń hayallarına qarata qollanılatuǵın sóz.
Búgin kórsem Jumamurattaǵı kelin, ... állekashan turıp qar artıp júr eken (T.Qayıpbergenov).
3. Hámme jas hayallarǵa qarata aytılatuǵın sóz.
— Kelin, salamat otırsızlar ma? (T.Qayıpbergenov).
0 Kelin bala — jas hayallardı erkeletip aytılatuǵın sóz.
Áne, kelin bala sen hám yadlaǵan bolsań bárimizdiń basımız birdey bolǵanı (T.Qayıpbergenov).
Kelin-pelin — a) ele kelin bolıp túspegen, kelin etip almaǵan keleshektegi kelinge aytılatuǵın sóz.
— Kelin-pelin gamlastırıp júrmiseń? (T.Qayıpbergenov).
b) kelin hám taǵı basqa birewlerdi qosıp aytatuǵın sóz.
v) Kelin-kepshik — jas hayallar, kelinler xám basqa da adamlarǵa aytılatuǵın sóz.
Kelin-kepshikler saw ma? (A.Begimov).
Kelin barmaq jiyde — Jiydeniń kishilew, tompaqlaw túri.
Kelin barmaq ekpe jiyde, Baǵıńda bar Kúlen bolıs (Berdaq).
Kelin barmaq júzim — júzimniń iri sopaq túri.
Kelin barmaq júzimlerdi kórgende Káramatdinniń awzınıń suwı qurıp ketti (J.Aymurzaev).