ILIW IV
Qaraqalpaqsha
f. awıs. Kiyiw, jamılıw.
Kiyimdi ústine iliwdi de umıtıp qapıǵa qaray umtıldı (K.Smamutov).
Bekbiyke ekinshi mártebe kóylegin kórsetti — ústime ilip alarday qalǵanı házir tek usı ǵana (Ó.Ayjanov).
Ekewimiz súwretke túseyik, — dedi bir kúni hámme taza kiyimlerin ústine ilip (M.Nızanov).
0 Qulaqqa iliw — tınlaw, esitiw.
Qulaǵına ilmeydi, jaman násiyat aytpa («Máspatsha»).
Zeyni iliw — túsiniw, biliw.
Ashıqlıqtı zeyni ildi, Ser saldı qıyır qıyaǵa («Máspatsha»).
Kózge iliw — esapqa alıw, ser salıw.
Malı joq dep maǵan qızın bermeydi, Pulıń joq dep jeńgem kózge ilmeydi (Berdaq).
Ókshesi iliw — awıs. Kúsh alıw, bir nársege súyenip, uslap turıw.
Ókshesi iler jer tappay qarmalaǵan Qosıbay qızdıń qunın dawlasıp edi (K.Sultanov).
Ilip sóylew — qaǵıtıw, astarlap aytıw.
Kórgen jerde ilip sóz aytatuǵın boldı (A.Begimov).
Ol aytqanı durıs, — dedi Ótemurat gáptiń ushın ilip alıp (K.Sultanov).