BERILIW
Qaraqalpaqsha
f. 1. Bir nársege kewil qoyıw, ıntıǵıp qaraw, ser salıw, ǵalaba qarasıw.
- Zıyanı joq, ... tásirli bir qıyalǵa berilip ketken shıǵarsız (A.Bekimbetov).
... balalıq qıyalga berilip sheberligimdi, uqıplı ekenimdi bir kórsetip taslaǵım keldi, ...(Ó.Ayjanov) Qanday is bolmasın oǵan shın berilip islew kerek (Gazetadan.).
2. Bir nársege beriliw, shuǵıllanıw, bánt bolıw.
Xızmette júrgende ishiwshilikke berilip, kóp jerde sırı ashılıp, xalıqqa kúlki bolǵan jerleri de boldı (Q.Ayımbetov).
3. Birewge bir nárseniń beriliwi, tapsırılıwi, baha beriliwi.
Mine, Perigúl bútin mektepten qaytıp kelip, muǵallim tárepinen úyge berilgen tapsırmanı orınlawǵa kiristi (Ó.Ayjanov).
Birinshi sóz Orıngúl Saburovaǵa berildi (J.Seytnazarov) ....az da bolsa miynet elleriniń obrazı berildi (G.Esemuratov).
... sóz basında túsinik berilgen (Q.Ayımbetov).
0 Máwlet beriliw - belgili bir nársege waqıttıń beriliwi.
Bayǵa eki kelte bazar, bir uzaq bazar — úsh bazar máwlet berildi (K.Sultanov).
Dákki beriliw — tıyım salıw, eskertiw, qaytarıp taslaw.
Olardıń dákkisi beriliwi kerek (S.Nurımbetov).