BAYLANÍS
Qaraqalpaqsha
at. 1. Adamlar, jámáát yaki jámiyet ortasındaǵı kelisim, eki jaqtıń arasındaǵı bekkem qarım-qatnas.
Seniń... Grisha menen baylanıs jasap ketkenligiń bir túrli etpey qoya ma? (Á.SHamuratov).
...bul xalıqlardıń mádeniy baylanıs partası bunday boljaw júrgiziwge múmkinshilik beredi (Q.Maqsetov).
Reti menen onıń ústine Abıldıń «qarındası» kirgende, kapitan ol qız benen kóbirek sóylesip, Sabırjan menen bolǵan baylanısı qaqqında soradı (A.Bekimbetov).
2. Sóylesik, kelisik.
Sonnan berli bulardıń doslıǵı bir-biri menen baylanısı úzilgen emes (Q.Dosanov).
Sapar menen Oraldıń arasındaǵı baylanıstan onıń xabarı joq (M.Ábdireymov).
3. Tiyisli, shártli, sıbaylas.
...jańa normalar, jańa jámiyetlik baylanıslar, kózqaraslar qáliplesedi (G.Esemuratov).
Sondıqtan denedegi anaw ya mınaw músheniń funktsiyasınıń buzılıwı, usı oraylıq nerv sisteması menen bas miyiniń baylanısı hákisleniwinen kelip shıǵatuǵını bizge júdá anıq (A.Bekimbetov).
4. Uzaqta turatuǵın adamlardıń bir-biri menen xabarlastırıwshı, sóylestiriwshi mákemelerdiń, keńsesi, telefon-telegraf, xat yamasa birew arqılı jasalatuǵın qatnas.
Baylanıs bólimi.
— Áwele baylanısın úziw kerek, meniń ayaǵımnıń astında telefon sımları jatır, — dedi ol sıbırlap (Ó.Ayjanov).