AMANAT
Qaraqalpaqsha
at. 1. Saqlaw ushın yamasa birewge sawǵa retinde beriletuǵın zat, nárse.
Jáhillerden heshwaq alma amanat, Kótererseń aqırında jamanat (Berdaq).
Bir nárseni waqıtsha paydalanıwǵa beriw, waqıtsha tapsırıp qoyılǵan zat, birewdin ekinshi birewge ótinishi, birotala emes waqıtsha berip qoyılatuǵın nárse.
Amanat aman saqlar (qq.x.e.).
2. Orınlawǵa tapsırılǵan minnet, wásiyat.
Nekemdi qıysa da qazı hám molla, Bergen amanatın alsa da alla (Omar).
Allaǵa amanat — aman-saw júriwin bir Allaǵa tapsırdım mánisinde.
Amanat dúnya — Amanat dunyyaǵa bes kúnlik «miyman», Bolsın tilde zikir, qálbinde iyman, Jamanlıq atawlın shıǵarıp miyden, dúnya dúzeledi, dúzelse adam (Aqsholpan Amaniyaz).
Amanatın tapsırıw — o dúnyaǵa rawana bolıw, qaza bolıw.
Kútpeǵende amanat jan tapsırıp, kete berdiń tilep bizge jaqsılıq (Aqsholpan Amaniyaz).