OTÍRÍW
Qaraqalpaqsha
f. 1. Bókseni jerge yamasa otırıwǵa arnalǵan orınlıqqa qoyıp, qanday da bir orındı iyelep ornalasıw, jaylasıw.
Kelgenler stoldı aynaldıra qoyılǵan skameykalarǵa otırıp atır (T.Qayıpbergenov).
Bir dizeden otıradı, Qozǵalmay tań atıradı (Átesh).
Ol otırsa opaq, tursa sopaq edi (qq.x.n.).
Stol dógereginde tórt kisi otırdı (A.Sultanov).
Biydiń jılqısı menen túyesine, qaramalına, at ústinde qalǵıp otırǵanın eslegenimiz Árepbay juwapker (K.Kárimov).
2. Jaylasıw, jasaw, ornıǵıw, turıw, mákan etiw.
Ájiniyaz eń jaqın qońsı otırǵan Xorezm xalıqları arasında bolǵan (B.Ismaylov).
Posyolkada otırǵan adamlardıń seyisxanasına deyin elektr shırası tur (S.Xojaniyazov).
3. Transportqa miniw.
Samolyottan túsiw men taksige otırdım.
4. Qanday da bir lawazımdı iyelew, lawazımǵa tayınlanıw.
Direktorlıq lawazımına otırıptı.
5. Jaza múddetin ótew.
Túrmede otırıw.
Qamaqta otırıw.
6. Rawajlanbay, tómen dárejede toqtap qalıw.
Onıń xojalıǵı sonnan baslap júdá otırıp qaldı.
0 Otırıp qalǵan — turmısqa shıqpay, jası ótińkirep ketken.
Otırıp qalǵan qız.
7. Kóm.
feyil.
Kómekshi feyil xızmetinde hárekettiń dawamlılıǵı mánisin bildirip keledi.
CHay demlep kútip otırıppan.
Maǵan qarap otıra bermey kete berseń boladı ǵoy.
Keshletip keledi dep kútip otırǵan xesh kimimiz joq edi (M.Nızanov).
Rulge otırıw — mashina aydaw; shofyor bolıp islew.
On altı jasımda úsh aylıq kurstı pitkerdim de, rulge otırdım (M.Nızanov).
Otırıp satıw — sawdagerge kótere satpay, ózi otırıp maydalap satıw.
Diyqan bergisi kelmeydi.
— «Ózim otırıp sataman», — deydi (M.Nızanov).