OBAL
Qaraqalpaqsha
at. din. s. Islam dinindegi Alla taalanıń baratqan janlı-jansız dúnyasına isleǵen qıyanetti bildiretuǵın sawap túsinigine qarama-qarsı uǵımlar jıynaǵı.
Qıyanet, gúná, zıyan, jábir, ayıp.
Obaldaǵay, shesheme obal bolǵan eken (K.Sultanov).
Bul jolda qaraydı kim obalıńa, Júrgil jaqtı jolǵa alıp baraman (I.YUsupov).
Qáytkende de, shayırdıń oqıwǵa tartımlı, qızıqlı syujetke qurılǵan 396 qatar usı qosıǵı «ógey» ge jorılıp, keyingi basılımlarda alıp taslanǵanı dım obal-aq (M.Nızanov).
Janıwardıń obalına qalasań (M.Nızanov).
Obaldı — obalı bar shıǵar.
Óz shalǵayı ózlerinen awıspay, «Obaldı» dewge bir tili juwıspay, ... (G.Dáwletova).
Obal boldı — qıyın boldı, qıyanet boldı.
Obalı moynıńa — birewge qılǵan gúná, qıyanetiń, óz basıńa degen mánide.
Obalı joq — sol kerek edi, ayawdıń keregi joq, tilegeni sol edi, sıbaǵasın aldı; Óz obalı ózine — obalı joq, ózinen kórsin, ózine ózi qıldı.
Obalına qaldı — qıyanet etti, qádirine jetpedi, jipá-jeksiz ayıpladı, kóz jasına qaldı.
Obalınan qorıqtı — qıyanet, gúná islemedi, Qudaydan qorıqtı.
Obalına ne kerek — jazıqsız jazıqlı qılmaw kerek; ayıbı joq, qolınan kelgen járdemin berdi degen mánide.
Obalına ne kerek, aqshanı sıtıp alǵan menen bizden jasırıp xesh nársege jumsamaydı (M.Nızanov).