KÓP
Qaraqalpaqsha
kel. 1. Mol, bir qansha.
Men kóp nárselerdi aytar dep oylaǵan edim,... (T.Qayıpbergenov).
2. awıs. Mudamı, bárxama, nedáwir, ádewir, uzaq waqıt, kán waqıt.
Bizdiń papamız kóp waqıttan beri awırıw edi (Ó.Ayjanov).
Kóp jıllar, qálem tarttı «xarıp talmay», Jazǵanı shıǵıp turdı biri qalmay (I.YUsupov).
3. awıs. Xalıq, kópshilik, qáwim, topar.
Jas bolsań da, shıraǵım, Tolı kópke bas ediń («Qırq qız»).
Etken isterińnen órnek kórsetip, Kóp aldında tabıs penen kózge tús (qq.poez.ant.).
0 Kóp uzamay - uzaqqa sozılmay, dárhal, tez waqıttıń ishinde.
Sol waqıyadan kóp uzamay ájaǵamdar jaydı satıp, mákan ózgertti, házir jayımızdıń qayaqta ekenligin saǵan aytpayman, sebebi, seniń tiri júrgeniń kerek maǵan (A.Sultanov).