KÚYIK II
Qaraqalpaqsha
at. 1. Uwayım, hásiret, muń, kúyinish.
Bilseń xabarsh beriń, kerwanlar, Qalıp turman xásiret penen kúyikke («Alpamıs»), Jetpiske hám keldi jasım, Kúyikten aǵardı shashım (Berdaq).
2. awıs. Auqattıń iyisi, tayar bolǵanı.
Pisken astıń kúyigi jaman (qq.x.n.m.).
3. awıs. Dárt, qayǵı, árman.
0 Bala kúyigi bawırda — perzenttiń jaman bolıwı hám baxıtsızlıqka ushırawınan adamnıń bawırına tásir etiwi, dártke ushırawı, qıynalıwı, kúyiniwi.
— «Bala kúyigi bawırda», — degen shıraǵım, uzaq joldan harıp-talıp kelgende, birden uwayım shekpesin dep esittire almadıq (Ó.Xojaniyazov).
Kózge kúyik bolı — qayǵı, xásiret, uwayım bolıw.
Bunıń bul júrisi kózine kúyik bolıp júr onıń, — dedi Sálima (K.Sultanov).
Sozsam qolım jetpes, kúyikseń kózge, Ortamızda tereń suw aǵıp turar (I.YUsupov).