KELTIRIW
Qaraqalpaqsha
f. 1. Bir nárseni aldırıw, qasına qoyıw, tayın etiw.
Sonıń menen birge Ziyba jalǵız bolmasın dep elden 150 qızdı tańlap alıp, qasına keltirip qoyadı (qq.x.e.).
Demniń arasında Artıq aǵanıń aldına shaydı keltirdi (T.Qayıpbergenov).
2. Arasına kirgiziw, suǵıw, ornıqtırıw, sáykeslew, úylestiriw.
Birew emes talayın, Mán jayına keltirdim («Qırq qız»).
Seyitjanǵa qarap bárekella-bárekella dep suwmandap, arasında diniy túsiniksiz sózlerdi de keltirip kúlimsirep qoyadı (Á.SHamuratov).
0 Kóz aldıńa keltiriw — elesletiw, oylaw, qıyallaw.
Barlıq isti kóz aldına keltirip, eriksiz jıladı (J.Aymurzaev).
Júzege keltiriw — jarıqqa shıǵarıw, iske asırıw.
Toplaǵan materialların júzege keltiriw tuwralı kóp oylanıp júrdi (G.Esemuratov).
Dúnyanıń sánin keltiriw — kórkemlew, bólendiriw.
Keltirdi dúnyanıń sánin, Hár bir kúnim maqtawlı kún (D.Qasımov).
Kámalǵa keltiriw — erjettiriw, shaǵına jetkeriw, boy jettiriw.
Solay bolsa da, óz miynetiniń nátiyjesinde eki ulın da kámalǵa keltirdi (T.Qayıpbergenov).
Ashıwın keltiriw — zeynine tiyiw, tullandırıw.
Azamatlardıń jarlılıǵın betine basıp, bolıs bulardıń ashıwın keltirdi (Q.Irmanov).
Zıyan keltiriw — shıǵınlandırıw, kesent keltiriw, zálelin tiygiziw.
Usınday otırıspanıń sebebinen baylarǵa kóp zıyan keltirip júrgensizler (Q.Irmanov).
Qaharmanlıq keltiriw — kúsh kórsetiw, mártlik etiw.
Kolxozdıń aǵzaları, qaharmanlıq keltirip júr (D.Qasımov).