EKI
Qaraqalpaqsha
san.
Bir menen úshtiń arasındaǵı sanaq san.
Eki qolına eki shelekti kóterip qıltıldap kiyatır (T.Qayıpbergenov).
Sáwle ketkeli Erjannıń eki kózi jolda boldı (S.Xojaniyazov).
Elmurattıń eki ǵana ulı bolǵan (J.Aymurzaev).
Eki boy, eki jaǵa — eki qaptalı, tárepi.
Ámiwdáryanın eki jaǵası qalıń toǵaydıq (B.Bekniyazova).
Kókózektiń eki boyı qayırdı, Zalım baylar Kókózekten ayırdı (Átesh).
0 Eki átirap — dógerek, aylana.
Eki átiraptaǵı jupar iyisli kók ósimliklerdi birim-birim kózinen ótkeredi (J.Aymurzaev).
Eki ernek — tárep, jaǵa, qaptal.
Kanaldıń eki ernegine asılıp, taǵı órge qaray júzedi (J.Aymurzaev).
Eki xádiyse — waqıya, jaǵday.
Kitap, jurnallar jóninde Aysánemniń eki xádiyse yadında bar (J.Aymurzaev).
Eki dúnya — a) eki dáwir.
Aysánemge bul jerde atasınıń eki dúnyanı salıstırıp, shın júreginen sóylegeni unaǵan edi (J.Aymurzaev).
b) awıs. O dúnya, bu dúnya.
...jolbarıstıń júregin bir tislesem, eki dúnyada ármanım joq («Máspatsha»).
Eki júzli — a) birewge bılay, birewge olay sóylewshi adam, ótirikshi.
Eki ortada men eki júzli bolıp, baxtıma naǵız qara tigildi, — dep Uǵıl kempir qorlıǵı kelip jılamsıradı (A.Bekimbetov).
b) eki jaǵında da júzi bar pıshaq.
Eki júzli qanjar eken qayralǵan (SH.Artıq).
Eki awız azǵana gáp, kishkene sóylesik, azıraq pikir.
Dayısınıń jalǵızınan eki awız sózin ayasın ba? (Ó.Ayjanov).
Eki ayrı — asha.
Ana tawdın kún shıǵar eteginde qulannıń jiligin qaq jarıp shıqqan bir túp ushı eki ayır jalǵız jıńǵıl bar (qq.x.e.).
Eki júzlilik — eki júzli bolıw.
Kernskiy basqarǵan Waqıtsha xúkimettiń eki júzliliginen diyqanlar birotala bezdi xám onıń xúkimet aǵzaların tutqınǵa aldı.
Eki ortada — arada, aralıqta.
Jeńil minezliliginen paydalanıp, eki ortada onıń áweresin shıǵardı (J.Aymurzaev).
Eki payda — eki ese túsirim.
...meniń pámimshe, biy usı dawdan eki payda kórip atır (K.Sultanov).
Eki ushlı — gúmilji, gúmanlı, belgisiz.
— Ey qáydem,... — dep Qosıbay ishinen balasın jaqsı kórip tursa da, qayalınıń aldında sır bergisi kelmey, eki ushlı juwap qaytardı (K.Sultanov).