BÓLEW
Qaraqalpaqsha
f. 1. Jas balanı besikke orap jatqızıw uyqılatıw.
Endi onı qaytadan besikke bóleyseń be? (K.Sultanov).
Usı waqta bópesin bólep atırǵan Sáliyma jalt arqasına qaradı (A.Bekimbetov).
Birewi kindik sheshemen, Birewi ózim kesemen, Ózim besikke bóleymen, Dep tartıslar bolǵan eken (Berdaq).
2. Ayrıqsha túr beriw, janarıw, sán beriw.
Orap aldı, kórki menen bóledi, Jır tabılsa jırlay bergim keledi (G.Esemuratov).
Mına dóndi tússeń asıp, Toǵay jatır qumdı bólep (I.YUsupov).
0 Ráhátke bólew — házlikte jasaw.
Ráhátke bóler janıńdı, Astında azıraq tursań, Qáne, usı gújimdey úlken, Qoyıw sayalı hám shoq bolsań (G.Esemuratov).
Nurǵa bólew — kún nurınan ráhátleniw, házleniw, miyri qanıw.
Jadırap jaynaǵan kún jer betin nurǵa bóledi (J.Aymurzaev).
Sazǵa bólew — hár túrli nama menen házlendiriw, ráhátlendiriw, qanaatlandırıw.
Saz dawıslı garmonǵa da til pitken, Ken dalanı sazǵa bólep múlgitken (I.YUsupov).
Gúlge bólew - jaqsı sánge keltiriw, túrlendiriw, jaratıw.
Gúlge bólep qaraqalpaq dalasın, SHóllerde ornatqan Gazlı qalasın (I.YUsupov).
Jipekke bólew - molaytıw, kóbeytiw, rawajlandırıw, bayıtıw.
Kolxoz, sovxoz moldan tutar nawkandı, Jipekke bóleymiz ullı Watandı! (Á.SHamuratov).