BÚGIW
Qaraqalpaqsha
f. 1. Bir nárseniń shetin qayırıw, qayırıp tigiw, búklew, kóklew.
Kuwırshaǵına kóylek tigip, Qıysıq jerin qayta sógip, Etek, jeńin tegis búgip, Kiyindirip saylaǵan soń (S.Májitov).
2. Eńkeytiw, qıysaytıw, iymeytiw, iyildiriw.
Onda basqa ǵarrılarday bel búgiw, hasa tayanıw degen joq (A.Bekimbetov).
Kózim jasqa, káwilim hásiretke tolıp, Qaramay belimdi búktim men búgin (I.YUsupov).
3. awıs. Jasırıw, qupıyalaw.
Sırın búgip sulıwlıǵın asırıp, Burqıp atır bulaq suwın qashırıp (G.Esemuratov).
Súyee qızǵısh yańlı qorǵar ıshqısın, Ishke búgip kalmas óz qızǵanıshlıǵın (I.YUsupov).
0 Dize búgiw — a) dizerlep otırıw, eńkeyiw, iymeyiw.
Sol zamatta awılınıń qız-kelinshekleri menen Miyirxan da jerge dize búkti (Ó.Xojaniyazov).
b) baǵınıw, qaraslı bolıw, bas iyiw.
Palwan biyhuwısh bolıp ketti de kelinshektiń aldına da dizesin búkti (Ó.Ayjanov).
Jeti nasırın búgiw — uyaltıw, qısındırıw, namısın keltiriw.
Adamnıń jeti nasırın búktiń ǵoy (K.Sultanov).
Namısın búgiw — qısındırıw, uyaltıw, namısın keltiriw.
...bular bizlerdiń namısımızdı búkti (Q.Ayımbetov).