BOSASÍQ
Qaraqalpaqsha
f. 1. Kewli jay bolıw, juwasıw, eriw, balqıw.
Atamurattıń janına batsa da fermadaǵı mallar oyına túsiwden bosastı (Ó.Ayjanov).
Nurbay konvertke qarap turıp, misli balasın kórgendey bosastı (A.Bekimbetov).
2. Bir nárseniń jibisiwi, oyanıwı.
Azlap suwıq samal tek tereklerdiń bosasqan usaq shaqaların biliner-bilinbes shayqap tursa da, jerde hesh bilinbeydi (Á.SHamuratov).
3. Bılqıldaw, sılqıldaw, iriw, bılshıraw, solıw.
...Qosıbay zil kirgen qawınday bosasqanda zańqıldaq qazı Esen ortaǵa túsip, mısqıl etti (K.Sultanov).
0 Kewli bosasıw — jumsarıw, eljirew.
Zoyanıń aytqan sózine hám bul ǵamxorlıǵına Timurdıń kewli bosasıp eljirep ketti (A.Bekimbetov).
Tula boyı bosasıw — eriw, balqıw, jibisiw.
...Húrjan eki kózin izden ayırmay jılamsırap tula boyı bosasıp jerge otırdı (A.Bekimbetov).
Jerdiń bosasıwı — tońnıń eriwi, jibiwi, jumsarıwı.
Suw toltırıp japtıń kenarın, Tonlar jibip, jerler bosastı (M.Qarabaev).