BAQSHA I
Qaraqalpaqsha
at. 1. Hár qıylı miywe hám palızlı eginler egilgen jer, sonday-aq, úy aldındaǵı egislik maydanshası.
Kishkentay baqshanıń ishi túrli miywe aǵashları menen tolǵan (A.Bekimbetov).
Kóktiń ańqıǵan jupar iyisi gúl baqshadan asqanday qonaqtıń tanawına tásir etti (A.Bekimbetov).
Jorǵa júrmel, tulpar kibi júyrikler, Adamzatqa shad bolǵanda kerekler, Baǵı-hárem, baqsha hám de terekler, Kózlerime sheńgel shelli kórindi (Berdaq).
2. awıs. Ómirdiń, tirishiliktiń quwanıshı, waqtı xoshı, saltanatı.
Raxmet, saǵan shıraǵım, Baqshadan gúller tergeyseń («Qırq qız»).
Aqırın aralayıq, — dedi Ayjamal, — áne baqsha, bizlerden emes qashıq (J.Aymurzaev).
Búlbúlim, sayra-sayra, Baqshada saz janlasın (I.YUsupov).