BALÍQ
Qaraqalpaqsha
at. 1. Suwda jasawshı, suwda júziw ushın qalash hám quyrıqları bar, saǵaqları menen dem alıwshı omırtqalı suw janıwarı.
Ílaqa balıq.
Sazan balıq.
Aqbalıq.
Suwen balıq.
SHortan balıq.
Bekire balıq.
Balıqtıń ómiri suwda óter (qq.x.n.).
Jumabay menen qol uslasıp balıq awlap, kólge ketken (K.Sultanov).
Qádirimdi xalıq biler, Xalıq bilmese balıq biler (Berdaq).
2. Usı suw janıwarınıń góshi.
Kuwırılǵan balıq.
Duzlanǵan balıq.
Balıq kombinatı yamasa Balıq zavodı — balıq konservasın isleytuǵın, tayarlaytuǵın orın, zavod.
Mináyım bir qırma balıq quwırdaqtı ákelip, qoyıp ketti (SH.Seytov).
Ayımxan degen qızınıń balası, Saparniyaz házir Qazaqdáryadaǵı balıq zavodında isleydi (Q.Ayımbetov).
Balıq konservası — balıq etinen zavodta ielengen konserva.
Erejep bir metr aq tovar, bir kilo qant, eki júz gramm chay, bir et konservasın, bir balıq konservasın aldı (T.Nájimov).
3. SHıǵıs jıl sanaw kalenlarında besinshi jıl ataması.
Balıq jılı.
0 Balıq bazarı — a) adamlardıń ǵawırlısı, shoq bolıp jıynalısıp turıwı, balalardıń bir jerde úymelesip oynawı.
b) balıq satılatuǵın arnawlı orın.
Balıq bazarı jańa ǵana qıza basladı (N.Dáwqaraev).
Balıq tartılıwı — balıqtıń azayıwı, kemeyiwi, qurtılıwı, joq bolıwı: Ekinshi birewler kólde balıq tartılıwı deydi (K.Sultanov).
Balıq basınan shiriydi — Is-qárekettiń ilgerilemewi, keyinge ketiwi, birewdiń qátelesiwi, natuwrı is islewi, bir nársege ákelip soǵıwı.
Balıq basınan shiriydi degen usı emes pe, há o zaqzaqı! Tiri masqara bolǵanıń ǵoy bul! Jeti túnde ne qılıp júrseń buzaqı!... (Ó.Xojaniyazov).
Altın balıq.
Bir jazıwshı aw salıptı, Ót qaqpay, júdá jalıqtı.
Endi qaytsam dep turǵanda, Tuttı ol altın balıqtı.
(T.Jumamuratov).