BAW I
Qaraqalpaqsha
at. 1. Bir nárseni bekitetuǵın, baylaytuǵın, bánt etiwshi jip yamasa basqa bir zat.
Ǵapıllıqta bawı úzilip túsip ketti («Máspatsha»).
Onıń kózindegi jipten bawı bar kózáynegi ele esimde (Q.Ayımbetov).
Bári de malaqaylarınıń qulaǵın túsirip, bawların baylap alǵan (T.Qayıpbergenov).
2. Kiyiz benen jabılǵan úydiń kiyizleriniń hár bir múyeshin bir-biri menen tutastırıw ushın úydiń sırtınan hám ishinen tartıp baylanatuǵın jip.
Gúmbirlegen aq otawǵa taǵılǵan túymeli tórt baw salbırap jarasıp tur (S.Xojaniyazov).
Jigit ornınan túrgelip qabaqtıń moynınan túnliktiń bawın baylap, qabaqtı shańaraqtan ishke qarap jiberip jiptiń ushın uslap, ... (qq.x.e.).
0 Bawı berk bolıw — saw bolıw, aman bolıw, kóbinese jas bala tuwılǵanda qutlı bolsın, ómiri uzaq bolsın dep tilek bildirgende aytılatuǵın sóz.
Áy shıraqlarım, mınaw balamnıń bawı berk bolsın, — dedi Nazlı kempir (K.Sultanov).
... aqlıq balańnıń bawı berk bolsın, sheshejan, — dep Sáliyma suwqıldap sóyley berdi (K.Sultanov).
— Nazarjan, qızalaqlı bolıpsań, bawı berk bolsın, — dedi jáne Bániw (O.Ábdiraxmanov).