ABÍRAY
Qaraqalpaqsha
at. 1. Ataq, dańq, mártebe.
Kolxozshılar arasında, rayon aldında iskerlik kútá abıray (Q.Dosanov).
2. Adamgershilik, qádir-qımbat, uyat.
Adam bolsań abıray izle, Otırar ornıńdı gózle, Tillerindi tartıp sóyle, Almań, — dedi Aydos baba (Berdaq).
3. Ele de, ońlı, jaqsı, qolay, durıs, sátli, kewildegidey.
Abıray, tayaq jegen balanıń denesine daq túspegen eken (Q.Ayımbetov).
SHertip qalmaq ketti páreń, Ákeń seniń Eset gereń, Bolıs bolsań adam jer eń, abıray aqsaqal bolǵanıń (Berdaq).
0 Abıray barda — qádirli waqıtta, erterek, waqıtında, aldın alıp, kún burın, gójeni tógip almastan burın.
Qamshı basıp atına, Burılmastan artına, Abıray barda awılǵa, Atınıń basın buradı (Berdaq).
Telefonnıń trubkasın usı abırayımnıń barında jıllı ornına aparıp qoydım (Ó.Ayjanov).
Abıray tógiw — qádirin ketiriw, abırayın qashırıw, baqasın túsiriw, abıraysızlanıw, qádirsizleniw.
At suwıtıp jetkende, abıraydı tóktiń be («Qırqqız»).
Awzın uraday ashqanı, Abırayınıń qashqanı (Berdaq).
Abıray-ataq — adamgershilik, qádir-qımbat, uyat, dańq, dáreje, mártebe.
Ol óziniń tuńgısh perzenti bolǵan qızı Sonyanı awıldıń úlken baylarınıń biri — iyshan Qulbayǵa berip, óziniń abıray-ataǵın taǵı da joqarı kóteredi (S.Ayniy).