ПӘТИЯ
Қарақалпақша
ат. 1. дин.с. Қолды жайып қуда жолына, өлген адамлар ушын яки аўқат жегеннен кейин айтылатуғын тилек.
Жаслығымда қайсындай ғаррының хызметин етсем де бәриниң пәтиясы биреў еди: «Өмириңниң нуры сөнбесин» дейтуғын еди (Т.Қайыпбергенов).
Мен аманлық-есенлик ушын пәтияға қол жайдым (М.Нызанов).
Дастурханға пәтия оқылып атырғанда: — Ҳәмдам, ҳәмдам — деген даўыс еситилди (С.Айний).
2. Тилек, алғыс.
Тап өзим олардың басларын қосыўға хақ нийетим менен пәтия берип, алды менен алғысын аламан, - деди Кәраматдиин (Ж.Аймурзаев).
Гәпине дослар ойланып, Пәтия берди, жыйналып (Т.Жумамуратов).
Аш арығын тойдырып, ел қуўантып пәтия алды («Мәспатша»).
0 Пәтия оқысыў — қыз-жигитти бир-бирине қосыўға келисиў, уәде берисип шәртлесиў, келисимге келиў.
Кисиге пәтия оқысып, мал өткерисип қойған қызымды биреў әкетип қалыпты, — деди жөн-жосақ та сораспай (Т.Қайыпбергенов).