БӨЛЕНИЎ
Қарақалпақша
ф. 1. Қопланыў, салланыў, доланыў, сазланыў.
Қыр дөгерек көклеп, ағашлар жасыл липасқа бөленди (А.Бекимбетов).
Қыз шайы-жипек липасқа бөленип, қасына қойылғай аппақ пәрдастыққа бас қойды (Т.Қайыпбергенов).
2. Шадланыў, йошланыў.
Хошамет сөзлерге бөленген дослардың ортасында Ғәний жымыйып күлип отырды (К.Султанов).
0 Қуўанышқа бөлениў — күлип ойнаў, шадланыў.
Султан менен Жийемурат бүгин жүдә әҳмийетли үлкен испиткерген адамдай шексиз қуўанышқа бөленип кетти (А.Бекимбетов).
Көкке бөлениў — көк өсимликлерге, тереклердиң көгериўи, өсимликлердиң көклеўи, сән бериўи.
Көкке бөленген бул уллы қала шынында да, қонаққа жүдә шырайлы көринди (А.Бекимбетов).
Сәнге бөлениў — көркем болыў.
...үй ишин әлле қандай сәнге бөленгендей азада көринди (Ө.Хожаниязов).
Рәҳәтке бөлениў — ҳәзлениў, рәҳәтлениў.
- Қәнекей, усындай самал мудамы есип турса! — дедим мен рәҳәтке бөленип (Ө.Хожаниязов).
Данққа бөлениў — атаққа, ҳүрметке ийе болыў.
Мийнет ислеп даңққа бөленсе де, оқыўға барса да бир жағында Орал жүр (М.Абдраймов).
Ҳүрметке бөлениў — иззетке ийе болыў.
Бөленген шексиз ҳүрметке, Көрмекши болар баслықгы (Б.Қайыпназаров).
Тынышлыққа бөлениў — урыссыз отырыў, урыссыз, жәнжелсиз отырыў, парахатшылықта жасаў, турыў, Жайдың иши тынышлыққа бөленген (Ө.Айжанов).
Ғамхоршылыққа бөлениў - қайырқомшылыққа, иззетке, ҳүрметке ийе болыў.
Халықтың ғамхоршылығына бөленген жыраўлардың мийнетлери жоқары баҳаланды (Н.Дәўқараев).
Гүллерге бөлениў — гүллердиң сән бериўи, гөззал түр бериўи.
Көзиме гүл-гүл дөнген кең дала, Гүллерге бөленген аўыл ҳәм қала (Т.Сейтмамутов).
Алтынға бөлениў — аўыс, молайыў, сәнлениў, оралыў.
Бийик жайлар бойын созып аспанға, Алтынға бөленген майдан далаң бар (Д.Қасымов).
Салтанатқа бөлениў — ҳәр түрли сәнге, саз-сәубетке ийе болыў.
Кеше өз салтанатына бөленип, дөнип тур (И.Қурбанбаев).
Күн нурына бөлениў — күннен рәҳәтлениў, ҳәзлениў (ҳәз етиў).
Бағ тоғайлар күн нурына бөленип, Жанғыртып сайрады қусы-бүлбили (Ж.Аймурзаев).